武肺蔓延至全球，而我哋正面臨第二波爆發中，成個社會氣氛真係前所未有咁低。
所以我決定唔寫愛情文，反而想分享一下我近排嘅感受。由農曆新年之後，基本上大部份時間都仍然係home office，生意當然少咗，不過基本上全香港都係咁，又唔係得我一個。反而呢個”悠長假期”令我多咗思考人生，令我大膽去做一啲我以前無諗過自己會做嘅嘢，因為都nothing to lose(笑)....亦幫我打多咗支強心針：如果大家欣然地接受生活嘅種種安排，又有咩資格向命運索求”給我更好嘅轉機”？
假如你正面臨失業，或者放緊no pay等等...心情都應該擔心又徬徨。但係諗太多唔實際，仲有工返嘅時候就盡200%努力，而多咗嘅時間就進修自己，積極補強令自己變得irreplaceable，亦花少少時間諗定後路，如果真係touchwood唔好彩比人X咗你自己有個Plan B。我亦有朋友已經開始搞副業，想將平時一直有研究開嘅興趣轉做生意，即管大膽喺呢個時候試試水溫追下夢想。
假如你已經失去工作，或者已經好耐無工開，請你記住失去工作並唔代表失去能力。就算世界對你幾涼簿都好，如果你自怨自艾，覺得自己永遠都係受害者，你只會繼續停滯不前。世上無一件事係偶然發生，就當今次係一個重新檢視自己技能同知識嘅機會，檢視自己嘅優點缺點，檢視自己嘅長處短處，從而再作改善，並且赤赤裸裸咁面對自己。好多人就係呢個時候搵返自己，從而突破搵到另一個行業，我自己都係一個咁嘅例子🙌🏼
假如你係老闆，係呢個時候你仲要帶住下面一大羣人，首先要同你講一聲辛苦晒🙏🏼 我相信船到橋頭自然直，係呢段時間我察覺好多老闆都對市場反應得非常之快。而且眼見有行業係呢個時候迫自己跳出comfort zone，例如將自己嘅傳統業務變成網上生意，其實係一個好好嘅reset。
過去大部份嘅香港人都係搵錢為上，朝九晚五都係為咗份糧，心靈嘅需求都懶得去聽，過去嘅夢想都忘記得一乾二淨，所以而家一有起事就亂晒陣腳。其實今次嘅低潮就正正係行業大洗牌，你可以睇到什麼類別可以留低什麼類別被社會淘汰。成日都話跌倒唔緊要，最緊要識得起翻身。如果你覺得自己係逆境中嘅悲劇主角，就請你繼續自怨自艾；如果你失去咗為夢想而奮鬥嘅勇氣，就請你繼續接受平庸嘅人生。但係如果你唔憤氣，就請你拿出勇氣唔好認輸！同命運搏鬥，既唔公平又公平。唔公平嘅係呢個世界唔係話付出就一定得到回報；公平嘅係你嘅付出起碼對得住自己。
琴晚有讀者inbox我：
反正都PK，要P就P得精彩啲。
我笑了。
#共勉之
#第一次唔係寫愛情文
#我都豁出去做IGLive
#你哋下次唔係唔睇呀
#女人像鹽

唔follow我IG點睇我IGLive?
https://www.instagram.com/missyboni/
Search